Eröffnung

„Radeau, Radeau, raditjes doe,
de Stadt, de hört de König toe,
radeau, radeau raditjes dum!
De Börmester led vebeden,
dat nüms mag kopen of verkopen
bevör de Klocke negen sleit,
bi Verlüß van Goderen
un all wat over tein Pund weggt,
is na de Waage to brengen,
un darnaa dree Daag free Markt!“

Moin mitnanner!

Ik frei mi, dat ji weer all komen bünd. Ik glööv, dat worden elke Jahr mehr Lüü, de hier vör de Trappen stahn. De Stadt is nooit so full, as an de Dagen van d´Gallmarkt. Dor kummt nix anners mit. Uns Gallmarkt is un blifft wat heel Besünners. Hier treffen sück de Lüü un hebben vööl Pläseer.

Siet lesd Jahr is ja weer vööl geböhrt.
Leer sall de Stadt blieven, waar man am besten inkopen kann. Daarum bün ik ok blied, dat wi een paar Geschäftslüü hebben, de neet de Kopp in d´ Sand steken, man wat doon. As Börgmester roop ik de Geschäftslüü up, de Tokumst van Leer in´t Oog to hollen. Dat tegen-n´anner-an brengt uns neet wieder. Blot tosamen könen wi bestahn tegen de anner Steden in Oostfreesland.

Vööl is ja geböhrt. Vööl ok van ehrenamtliche Lüü, dat beste Bispööl is uns Heimatvereen un dat Schipperklottje mit de Maiboom, de Wiehnachtsmarkt un dat Oldschippstreffen.
De Börgers hebben sück ok Gedanken maakt. So um de hunnert Leeraners hebben sück in en Planungswarkstee överleggt, wat man beter maken kann,
waar wat passeren mutt. Daar bünt heel vööl gode Ideen bi rutkomen und nu geiht dat daarum, wo man wat umsetten kann.
Ok wi as Stadt hebben noch vööl vör. An de beste Platz an d´ Haven, waar nu noch en veer-spörig Straat verlöppt, sall een freei Platz entstahn, waar man wat bauen kann.

Vööl is ok över de Neeibau van d´ Spaarkasse proot worden. Ik glööv, dat word heel wat Besünners vör de Innenstadt. Van de groot Forum vöör veerhunnert Lüü , wat daar inbaut word, hett neet blot de Spaarkasse wat, nee, wi all könen daar rin, wenn daar Veranstaltens sünd. Un tweehunnertfieftig Arbeitssteden blieven in´t Zentrum.
In de Oldstadt baut de Volksbank, dat kakelbunt Huus van Bünting treckt de Minsken an un so is immer wat lös in Leer. Wi blieven neet stahn. Wi gahn mit de Tied.
Dat mutten wi ok. Man wi hebben ok wat to verlesen: achtteindusend Arbeitssteden hebben wi in Leer. Bald de Hälfte van all Arbeitssteden in d´Kreis Leer sünd in uns Stadt, vööl in d´ Eenzelhannel un in de Gastronomie. De sullen wi neet up ´t Spööl setten.

Leer is ok een Stadt , waar man good leven kann. Neet umsünst bünd de Bausteden futt weg, wenn se anboden worden. Abers vööl Minsken willen ok midden in d´ Stadt wohnen. De trekken dann van wied her na Leer. För de Seniorenresidenz, de up d´Nesse baut word, gifft vööl Nafraag.

Ok rund um de Gallmarkt is vööl baut worden un word ok noch vööl baut. Ik hoop, dat daar dann all Frünnen van d’ Gallmarkt wohnen, anners könen se uns de Gallmarkt lahm leggen.

Up de Oostfreeslandschau was dit Jahr weer en Spegelbild van uns Wirtschaft to sehn.
De Ministerpräsident McAllister, de schottische Wuddels hett, was blied daarover, wat Oostfeesland all so to beden hett. Wi hebben uns good verstahn, viellicht kummt dat ok daarvan, dat man de Schotten un de Oostfreesen beid naseggt, sünig to wesen. Ok daar gifft dat een schottische Spröök, de ut Oostfreesland wesen kunn. De seggt “A canna sell the cou an sup the milk”. Dat verstahnt wi ok. “Man kann neet de Koh verkopen un de Melk supen”. Of : “Well de Koh slacht, word de Melk quiet”. Wi Oostfreesen könen dat noch körter seggen: “Wat weg is, is weg!”

Wo wi al van Melk proten. Leer is mit de Buurderee eng verbunnen. Wi hebben noch dat Melklaboor un de Vereen Oostfreeske Stammviehzüchter in uns Stadt. Un uns Galliveehmarkt is over de Grenzen van Oostfreesland bekennt. In uns Heimatmuseum löppt upstünds noch en Utstellen over de Oostfreeske Melkgeschicht.
In de Stadt was man froher up de Buren anwesen, wi in Leer besünners up de Reiderlandjers. Un immer noch komen se over d’ Eems, um Gallmarkt to fieren.
Un neet blot fieren: Hulpen hebben uns de Landfrauen ut d´Rheiderland bi ´t Schummeln van uns Raadhuustoorn. Mit Emmers un Bessens bünd se ankomen un hebben sück de Raadhuustoorn vörnohmen. Nu is all weer blitzblank.
As Dank hebb ik hör to´n Koppke Tee inladen. Wi hebben uns kennenleert bi de viefhunnertste Gallmarkt.
Do hebben de Landfrauen mi lüttje Büdels neiht, waar ik mien Geld un mien Handy rinstoppen kunn. Disse Frauen bünd leep flietig, dat kann ik jo seggen.

Flietig sünd ok de Politikers, de weer in d´ Landdag na Hannover willen. De Wahlen bünd in Januarmaant. Nu mutten de Kandidaten um jo Stimm warven. Ik hoop, dat ji ok all na de Wahl hengahnt.
Wi bruken en gode Draht na Hannover, daar kummt vööl Geld her vör uns Projekten. Leer hett en good Ansehn in Hannover. Man neet blot daar.
In d´token Jahr hebben wi hier in Leer de Liegeradweltmeesterskup. Ik bün stolt, dat wi de na Leer kregen hemmen.

Daar gifft dat dann neet blot Liegeraden to sehn, sünnern ok Raden, mit de man up ´t Water fahren kann. Dat word en heel groot Spektakel. Ik laa jo nu al in, jo dat antokieken.

Ik freei mi besünners, dat dit Jahr ok weer uns Frünnen ut Trowbridge un Elblag komen bünd. „A warm welkom, especially to the Mayor John Knight and Präsident Grzegorz Nowaczyk!” Siet Jahren sörgt Trevor daarvöör, dat wi bi d´Gallmarkt ok immer an de Königin van England denken. Dat passt ok to Leer.
Denn uns Stadturkunne is van King George de veerde bi London unnerschreven worden. De was dotieds ok uns König.
Vööl Nederlanners besöken Leer un de Utrooper van Winschoten, Geert Veen, will jo Vandaag all weer to de Adrillenmarkt inladen.

Mit uns egen Herolde hebb ik disse Mörgen al up Inladen van Bünting in de neei Coloniale frühstückt. Daar sünd se ja an d´ Gevel verewigt. Se hebben nu al en lang Tour dör de Stadt achter sück.

Besünners danken will ik de Postkapell för de Musik. Se hett weer daarvör sörgt, dat de Tied neet lang worden is.
Een Applaus för de Postkapell, de uns al so vööl Jahren an disse Stee upspöölt !

Ik dank ok all annern, de daarvör sörgen, dat up de Gallmarkt all wunnerbaar löppt, de Schaustellers, de Polizei, dat Rood Krüüz, de Füürwehr un neet to vergeten uns Marktmesters, Helmut Kruse, Thomas Wilbers un de Veehmarktmester Uwe Vogelsang. Ik wünsch jo all moi Dagen up d´Markt un vööl Pläseer. Un nu willen wi uns Herold hören.

Un nu fiev Dag free Markt!